Heritage Horizons: Pathways to the Future
A Heritage Council Conference
Tá an Treoirchlár Idirbhliana um Oidhreacht sna Scoileanna ina thionscnamh corraitheach nua de chuid na Comhairle Oidhreachta, lena gcuirtear leis an rath atá ar an gclár atá ar bun againn le fada i mbunscoileanna.
Leis an treoirchlár seo, cistítear speisialtóirí oidhreachta chun cuairt a thabhairt ar dhaltaí Idirbhliana sna scoileanna rannpháirteacha. Soláthraíonn ár speisialtóirí seisiúin idirghníomhacha ar ghnéithe éagsúla d’oidhreacht na hÉireann, idir stair áitiúil, sheandálaíocht, bhithéagsúlacht, agus scileanna traidisiúnta. Tá na cuairteanna deartha chun tacú leis an gcuraclam agus chun feidhmiú mar uirlis agus acmhainn oideachasúil bhreise do mhúinteoirí.
Gnóthóidh daltaí tuiscint níos doimhne ar an oidhreacht trí iniúchadh a dhéanamh ar láithreacht na hoidhreachta sna háiteanna ina gcónaíonn siad, toisc go n-úsáidfidh speisialtóirí láithreáin oidhreachta, sainchomharthaí tíre stairiúla agus timpeallachtaí nádúrtha sa limistéar áitiúil mar sheomraí ranga beo.
Is é aidhm an chláir tuiscint níos inbhraite ar an oidhreacht agus ar an ról atá aici i saol na hÉireann a chothú i measc daoine óga.
An Dóigh a nOibrítear an Clár
Faigheann na scoileanna rannpháirteacha leithdháiltí cuairteanna agus modúl, a gcistíonn an Chomhairle Oidhreachta iad, lena gcumasaítear do dhaltaí tairbhe a bhaint as seisiúin i bpearsa agus as tionscadail chomhoibríocha. Bíonn na seisiúin sin sa raon idir cuairteanna aonair agus modúil ilseachtaine, agus iad sách solúbtha chun freastal ar na riachtanais atá ag gach scoil. Imríonn scoileanna ról ríthábhachtach maidir le meastóireacht a dhéanamh ar an gclár freisin trí aiseolas a thabhairt don Chomhairle Oidhreachta ina leith.
Áirítear iad seo a leanas leis na seirbhísí a thairgeann speisialtóirí oidhreachta:
- Cuairteanna lae i bpearsa, lena n-áirítear:
Cuairteanna lánlae (níos mó ná 5 huaire an chloig d’am teagmhála)
Cuairteanna leathlae (3 huaire go 4 huaire an chloig d’am teagmhála)
Cuairteanna seisiúin aonair (uair amháin go dhá uair an chloig d’am teagmhála) - Modúil Idirbhliana a fhorbraítear ar bhonn comhoibríoch, lena n-áirítear:
Sé sheisiún aonair san iomlán in aghaidh an mhodúil (seisiún amháin in aghaidh na seachtaine ar feadh sé seachtaine de ghnáth)
Am idirchaidrimh agus pleanála idir an speisialtóir oidhreachta agus an múinteoir iomchuí
Glac Páirt sa Chlár
Tugadh cuireadh do na scoileanna rannpháirteacha dul isteach sa chlár le linn théarma samhraidh na bliana 2024. Chun faisnéis níos mine a fháil faoin dóigh a n-oibrítear an clár, léigh an leabhrán faisnéise thíos.
Tuilleadh Faisnéise
Chun tuilleadh mionsonraí a fháil, nó chun a fhiafraí cén dóigh a bhféadfadh do scoil rollú sa Treoirchlár Idirbhliana, déan teagmháil leis an Dr Eoin Ó Donnchadha, an tOifigeach Forbartha Beartais um Oidhreacht san Oideachas sa Chomhairle Oidhreachta.
