Aithnítear aon mhúsaem déag i ngeall ar na caighdeáin is airde a bhaint amach d’aire a thabhairt do bhailiúcháin mhúsaeim

Clár creidiúnaithe é an MSPI a thacaíonn le músaeim agus le bailiúcháin oidhreachta cultúrtha ar fud na hÉireann chun na caighdeáin is airde a bhaint amach agus a chothú sa bhealach a dhéantar iad a bhainistiú, conas a thugann siad aire dá mbailiúcháin, agus conas a dhéanann siad idirchaidreamh leis an bpobal. Tacaíonn sé le hinstitiúidí móra agus beaga – idir mhúsaeim áitiúla atá á gcur ar siúl ag oibrithe deonacha agus fhorais chultúir náisiúnta – chun bunchlocha daingne i rialachas, in aire a thabhairt do bhailiúcháin, i dtaispeántais, in oideachas agus i seirbhísí do chuairteoirí a fhorbairt.

Ó cuireadh tús leis in 2006 agus gan ach dornán rannpháirtithe ann, tá fás tagtha ar an MSPI ina chlár ar fud na tíre a thacaíonn le nach mór 70 suíomh músaeim. Oibríonn músaeim i gcaitheamh roinnt blianta chun 32 caighdeán gairmiúil a bhaint amach agus déantar measúnú orthu trí phróiseas dian neamhspleách.

Tá aitheantas á thabhairt i mbliana do 11 mhúsaem as creidiúnú a bhaint amach trí chlár an MSPI. Tugtar chun solais lena n-obair dhian agus a dtiomantas an tábhacht a bhaineann le hoidhreacht shaibhir na hÉireann a chosaint agus a roinnt. Thug gach músaem faoi mheasúnú mionsonraithe lena thaispeáint conas a bhaineann siad na caighdeáin riachtanacha amach agus conas a fhreastalaíonn siad ar a bpobail, a gcuairteoirí, agus a mbailiúcháin.

Ábhar suntais ar leith iad trí mhúsaem a bhain Creidiúnú Iomlán amach den chéad uair – an leibhéal is airde d’aitheantas atá ar fáil tríd an gclár:

· Tá aitheantas á thabhairt do Mhúsaem Náisiúnta Muirí na hÉireann i nDún Laoghaire a bhuíochas lena shárthiomantas d’oidhreacht mhuirí na hÉireann a chaomhnú agus a léirmhíniú, agus as obair thiomnaithe a oibrithe deonacha agus a fhoirne i dtaobh an músaem a bhunathrú le blianta beaga anuas.

• Bhain The Model – Home of The Niland Collection i Sligeach Creidiúnú Iomlán amach, a thaispeánann an dícheall atá á dhéanamh acu i dtaca le sáraire a thabhairt dá bhailiúchán agus do rannpháirtíocht an phobail, go háirithe sa bhealach a chuireann sé beocht in ealaín thábhachtach na hÉireann do lucht féachana áitiúil agus náisiúnta araon.

• Bhain Plás Nano De Nógla i gCorcaigh Creidiúnú Iomlán amach freisin, a léiríonn an rath a bhí ar an suíomh seo a bhuaigh gradam i dtaobh cothromaíocht a bhaint amach idir caomhnú na hoidhreachta agus cláir dhinimiciúla oideachais agus do chuairteoirí ina bhfiosraítear leagáid shóisialta Nano De Nógla agus Shiúracha na Toirbhearta.

Dúirt an tAire Stáit Dúlra, Oidhreachta agus Bithéagsúlachta, Christopher O’Sullivan, TD agus searmanas an lae inniu á sheoladh aige i gCaisleán Chill Chainnigh:

“Is onóir dom searmanas bronnta creidiúnaithe an lae inniu a oscailt don Chlár um Chaighdeáin Músaem in Éirinn agus chun an tionchar as cuimse a cheiliúradh a imrítear inár músaeim, ár ndánlanna agus ár n-earraí agus áiteanna stairiúla ar fud na tíre. Tá moladh tuillte ag an aire agus an aird dhíograiseach a thug na 11 mhúsaem chreidiúnaithe chun ár n-oidhreacht a chosaint, agus an léirmhíniú atá á choimeád acu lena chur ar chumas tuiscint níos fearr agus níos éasca a bhaint as ár n-oidhreacht. Cruthaíonn éachtaí na músaem seo gur féidir linn a bheith bródúil go bhfuil scoth mhúsaeim an domhain againn, gur féidir linn a bheith muiníneach go bhfuilimid gairmiúil, cuimsitheach, eolach agus uaillmhianach dár n-institiúidí oidhreachta cultúrtha.”

Dúirt Cathaoirleach na Comhairle Oidhreachta, an Dr Martina Moloney, agus í ag labhairt leis na músaeim chreidiúnaithe inniu:

“Glacann músaeim agus bailiúcháin oidhreachta cultúrtha le ról mór inár gcomhrá náisiúnta. Dírítear go príomha san MSPI ar bhailiúcháin oidhreachta cultúrtha agus ar an lucht féachana ar a bhfreastalaíonn siad agus bealach atá i gcaighdeáin ghairmiúla trínár féidir linn na luachanna seo a chinntiú. Tá an obair a rinne ár músaeim chreidiúnaithe sárluachmhar i dtaobh tacú leis na caighdeáin seo. Leanfaidh an Chomhairle Oidhreachta lena míle dícheall a dhéanamh chun na dálaí a chruthú inar féidir le bailiúcháin oidhreachta cultúrtha, músaeim, dánlanna agus suíomhanna oidhreachta teacht chun cinn agus an rath a bhaint amach.”

I dturas an ama, dúirt Príomhfheidhmeannach na Comhairle Oidhreachta, Virginia Teehan:

“Ba mhaith liom moladh a thabhairt do gach ceann de na músaeim chreidiúnaithe in 2025 as an ndíriú a léiríonn siad lá i ndiaidh lae, as pobail a spreagadh le saincheisteanna sochaíocha, idir chomhaimseartha agus stairiúla, trína mbailiúcháin agus a n-eagraíochtaí. Is mór againn an obair a dhéanann na músaeim seo agus an mórchumas atá ag ár músaeim tionchar a imirt agus na heagraíochtaí oidhreachta cultúrtha a ndéanann siad ionadaíocht dóibh. Ba mhaith liom comhghairdeas a dhéanamh, thar ceann na Comhairle Oidhreachta, le gach ceann de na 11 eagraíocht a bhfuil a gcreidiúnú á fháil acu inniu.”

Ag féachaint chun cinn, tá an Chomhairle Oidhreachta tiomanta do chinntiú go leanann an MSPI ag freastal ar riachtanais na hearnála músaem atá ag teacht chun cinn. Déanfar sraith feabhsúchán go ceann 12 mhí ar an gclár, cosúil leis na caighdeáin a nuashonrú chun dea-chleachtais chomhaimseartha a thabhairt san áireamh, oibríochtaí an chláir a nuachóiriú chun feabhas a chur ar chumarsáid agus ar thacaíocht, agus an próiseas iarratais a chuíchóiriú lena cheadú fiú níos mó músaem ar fud na hÉireann tairbhe a bhaint as an gclár.

Nótaí d’eagarthóirí

Déan teagmháil, le do thoil, le Pearse Ó Caoimh le hagallamh a shocrú.

Guthán: 085-8590378 R-phost: pocaoimh@heritagecouncil.ie

*Is iad na músaeim a bhainfidh creidiúnú amach inniu:

Creidiúnú iomlán

Músaem Náisiúnta Muirí na hÉireann (Baile Átha Cliath)

The Model, Home of The Niland Collection (Sligeach)

Plás Nano De Nógla (Corcaigh)

Creidiúnú á choimeád

Gailearaí Náisiúnta na hÉireann (Baile Átha Cliath)

Músaem Thomáis Mhic Dhonnchadha (Tiobraid Árann)

Músaem Dhoire Cholm Chille Shaor (Doire)

Músaem Bád Aeir agus Muirí Fhainge (Luimneach)

Cartlann Scannán na hÉireann Institiúid Scannán na hÉireann (Baile Átha Cliath)

Músaem Chontae Chiarraí (Ciarraí)

Músaem Chnoc Mhuire (Maigh Eo)

Creidiúnú Eatramhach

Áras Nua-Ealaíne na hÉireann (IMMA)